أحدث مصطلح سوداني سوداني رسمياّ وشعبياً ، عند الساسة والعامة والسابلة وناس الشلب والهمبكة ووجع القلب !
الفتيل رمزاً للضيق والمكربة ! هكذا كانت الإشارة والمغذي ،
والفتايل انواع ومقاسات ،
فتيل للكيزان ود الأصلي حسب علمي
وفتيل للقحاطة وده لسع قيد التصنيع ! وشكلوا مضلع كدة زي صندوق الإنتخابات لو قامت أو تم التصنيع زائد
فتيل الإسرة والإجتماعيات والضحكة والونسة واللمة وحزب الأمة والعقد الإجتماعي الجديد ، مش قلنا أسرة !
لكن عاطفيا فتيل العشاق ده الفتيل الذهبي لمافيه من دموع وشمارات وصاحبات وتلفونات وأشياء تانية حاميني يعرفها العشاق خاصة الذين تعرضوا (للشلب) والمقصات اكيد فتيلهم بشيل كتير !
أما أعجب الفتايل فهو فتيل الليدو وهو متوفر عند اقرب صديق ومضمون عند الحريف وفي لفة الجريف (فتيل التوسان) البغرف رجال ونسوان !!!.
أما فتيل النسوان فهو الفتيل الأوسع والمتمدد في الأزقة والحواري والجبنات وحتي في دق الريحة (الحاجة دي قلت مع الكورونا ) لكنهن استحداثن مواعينها فقد انتشرت في واتساب و فيسبوك خاصة قروب أفضح خاين وإحترس امامك كشة وسيد الرقشة ومشاهير الدنيا وناس الصفقة والنووش ، الله منهم .
أما اظرف الفتايل فهو فتيل فهو فتيل الفلس ، وده بختك في الضيق ذاتو !!! ولان الشعراء كانوا حاسين بالحتة دي خلو ليكم مساحة في أغنية (الهجروك عليا) واوصيك بسماعها من الفنانة البرنسيسة سمير دنيا ولاتنسي المقطع المقصود (الضيق والنااااار عليا) شمبات !! خلا ! الكلام ده من بدري ياخ خاصة الفتيل ده !
هناك فتايل متعددة الأغراض و الإستخدامات ومقاسات كثيرة ، أوسعها فتيل النفخ وجر الهوا وسواقة الناس بالخلا واضيقها فتيل خطاب الكراهية وموجة التنمر والتقليل من قدر الناس وهنا انت البتدخل في الفتيل لانك جاهل والجهل فتيل الجهلاء !!!!
سياسياً استحدث الفريق أول محمد حمدان حميدتي فتيل الضر في الديمقراطية وده يتم تجهيزه للأحزاب التى تنادي بالديمقراطية نظام قشرة كدة وما دايرتها وما بتجيب سيرة الإنتخابات نهائي زي زولك بتاع الكورونا من تجئ سيرة الجائحة ساهي بخت كمامتو وبلبس جواربو وبنطط حواجبو
حميدتي حدد نوع الفتيل حيث قال (الديمقراطية الناس البتكلموا بيها دي ، ضر بس كدة بنجيبها ! وهي هدية بالمناسبة مجانية لأحزاب الشعارات ، ولجداد التنمر بالذات ولمختلف المنظرين المتنطعين ! ، مش في واحد كدة فالق راسك يومي كدة ؟ يلا ده اديهو من فتيل الضر ده !
وطبعا ما ممكن ننسي فتيل (الفارات) والرهاين في القعدة و(الضربة) و(الخبتات) الواحد شغال يومية حديد ويجئ يشتت حق اليومية في أي مزيكا بتدق قوم ياعاطل .
عندك فيسبوك ،، أكيد مش كدة ؟ يلا ما تنسي انت متوهط في فتيل اسمو (شيرو ) شيرو اللايف ! شباب شيرو اللايف ده مايقع ! ولوسألت نفسك الزول ده بلعلع بقول في شنو طبعا مافي رد ! وده نتيجة طبيعية لوضع الفتيل ، بطبعه الفتيل صغير وهوا مافي و ( مخك صغيير ) صح ؟ والبديك نصيحة مافي !
اقول ليك ..شوف باقي الفتايل أمكن فتيلك إنكسر !!!
