شيخ الأمين : أكبر سوق في البلد دي (الحفر لبعض)

البقولو إني شيخ الطبقة البرجوازية حاسدين ساي)
(….) هذا هو رأيي في حميدتي ..والبشير “خلاص زمن وانتهي”
كل ذي نعمة محسود وأنا محسود لهذه الأسباب
الحاجة الوحيدة البتخلينا لسي بنفرح إنو في وطن لسه ما فقدناهو
“الناس ما اتعودوا الصوفية يكونوا مهندمين ومتابعين التكلنوجيا”
(المسيد بتاعي لامي الكيزان على الشيوعيين على القحاتة)
السياسيون أنانيون جدا والبرهان ربنا يثبتو
(الناس مركزة في الجوانب السلبية والتنمر علي في الفيس والواتساب)
حوار : محمد جمال قندول
أساليب عصرية في الدعوة ابتكرها جعلته في مرمى نيران (الانتقادات) بالأسافير حتى بات (الشيخ) صانعا لـ الترندات في كثير من المناسبات . والحديث هنا عن الشيخ ﺍﻷﻣﻴﻦ ﻋﻤﺮ ﺍﻷﻣﻴﻦ، ﺷﻴﺦ ﺍﻟﻄﺮﻳﻘﺔ ﺍﻟﻘﺎﺩﺭﻳﺔ ﺍﻟﻤﻜﺎﺷﻔﻴﺔ ﺑﺄﻡ ﺩﺭﻣﺎﻥ، وﻭﻛﻴﻞ ﺍﻟﺸﻴﺦ ﻋﺒﺪ ﺍﻟﻠﻪ ﻭﺩ ﺍﻟﻌﺠﻮﺯ بولاية الخرطوم والذي برز ضمن أكثر الشخصيات إثارة للجدل.
(الإنتباهة) جلست لـ شيخ الأمين في حوار اتسم بـ الصراحة بلغة بسيطة وعفوية حيث طاف على أسلوبه بالدعوة وآرائه بـ السياسة والفن والمجتمع فإلى مضابط إفاداته .

* شيخ الأمين برزت كشخصية مثيرة للجدل ؟
= لأنو الناس اتعودت على مشيخة الطرق الصوفية ما يكونوا مواكبين الحداثة والتقنيات والصيحات الطالعة جديدة بالتكلنوجيا فشيخ الأمين استحدث وسائل التواصل مع المريدين والحيران وبحب أوضح حاجة مهمة جدا محبي ومريدي وحيران شيخ الأمين ناس تانيين خالص مواكبين العصر في العلم والتكلنوجيا ومعانا الدكاترة والمهندسين ورجال المال والأعمال وشريحة الشباب العصري.

*قبيل أيام ظهرت عبر فيديو يحتفل معك آخرون بعيد ميلادك الحدث كان بمثابة استهجان ؟
= استهجان ليه .. والغريب في كدا شنو ونحن بنحتفل بميلاد سيدنا المصطفى صلى الله عليه وسلم والحسين ، دي ناس حاسدة ساي.

*الحسد في شنو ؟
= الحسد أي شي يعملو شيخ الأمين الناس بترفضوا بتستنكروا مع أنو ما بستاهل يعني عيد الميلاد الناس كلهم بحتفلوا بيهو وبصوم.

*اشتهرت بشيخ الجكس والبيبسي ؟
= تريقة من الناس على أساس انو ما اتعودوا الصوفية يكونوا مهندمين ومتابعين التكلنوجيا.

* ما بتنزعج من الانتقادات دي ؟
ــ كل ذي نعمة محسود وأنا محسود جدا.

* لكن البعض يرى بأن تفاصيل الذكر لدى شيخ الأمين فيه تناقض مع الصورة المعلومة لـ شيوخ الدين ؟
= أنا ماشي على سيدي رسول الله كان بهتم بنفسو وشكلو من تفاصيل تسريح الشعر وتكحيل العيون وتخضيب وقال حبب لي في دنياكم ثلاثة (الطيب) لازم الإنسان يكون مهتما بنفسو وطريقتو.

*علاقتك بالسياسة ؟
ـــ ما عندي أي علاقة بيها.

*رأيك شنو في الحاصل بالبلد ؟
ــ الحاصل دا عايز دعاء بس.

*والحل ؟
ــ نتفق.

*الاتفاق دا بحصل ؟
ـــ نحن السودانيين ما اتعودنا نتفق ولكن نقول ربنا يسهل الأمر.

*علاقتك بالرياضة ؟
ــ بدعم الرياضة وأي حاجة للشباب بدعمها.

*ظاهرة اجتماعية سلبية ؟
ـــ الناس ما قادرة تفرق بين الانتقاد والشتيمة الواحد يشتم ويقول ليك دا شخصية عامة هل يعني أي مشهور يجوز إنو يتشتم.

*الناس برضو شايفة طريقتك في الدعوة غريبة هل دا ممكن يكون سبب في إنك تكون مرمى لنيران الانتقادات ؟
ـــ السؤال الطريقة الغريبة الشايفنها الناس نجحت ولا ما نجحت.

* إنت شايف إنها نجحت ؟
ــ نجحت بنسبة مليون في المية.

* معايير نجاح دعوتك مقارنة بالشيوخ الآخرين شنو ؟
ــ إقبال الشباب لها بأعداد هائلة داخل وخارج البلاد.

*لكن في ناس بقولوا إنك شيخ طبقة برجوازية ؟
ــ دا من باب الحسد الأنا فيهو.

*الناس شايفة مسيدك كلو عربات آخر موديل دا ما بؤكد البقولو الناس ؟
ــ ودا بأكد ليك إنو فعلا محسودين.

*علاقتك بالموسيقا والفن ؟
ـــ أحبها جدا.

*ما غريبة إنو شيخ يكون محبا لـ الغناء ؟
ــ ما في غرابة لانو الغناء مسألة خلافية في الحرمو وفي كذلك الحللوها.

*قلت ما عندك علاقة بالسياسة ولكن في سنوات سابقة عرف أنك كنت قريبا من قيادات الدولة ؟؟
ــ المسيد للآن بستقبل في قيادات الدولة وبسع الكل.

*بتحب تسمع لمنو في الغناء ؟
ـــ الحقيبة ، بسمع للكاشف.

*في الرياضة بتشجع منو ؟
ــ كل لعبة حلوة بشجعا.
*هلال ولا مريخ محليا ؟
ـــ الاثنين.

*كأس العالم .. بتشجع منو ؟
ــ متوجه لـ الدوحة لحضور فعاليات المونديال وبدعوة من شخصيات مهمة هناك وماشين نحضر اللعبة الحلوة.

*هل عرف عنك أي انتماء سياسي سابق في شبابك ؟
ــ ما في أي انتماء سياسي.

*علاقتك بـ لندن ؟
ــ عندي هناك شغل.

* ومصر ؟
ــ عندي فيها عقارات.

*قبل سقوط البشير غبت سنوات عن السودان ؟
ــ كان عندي مشاكل مع البشير.

* ما لا يعرفه الناس عن شيخ الأمين ؟
ــ الناس طبعا مركزة في الجوانب السلبية والتنمر علي في الفيس الواتساب لكن في حاجات كتيرة ما بعرفوها عني.

*زي شنو ؟
ــ انتهيت من مشروع السقيا وحفرت 19 حفيرا في شمال كردفان الحفير الواحد بسقي ليهو أربعة ولا 5 قرى ، وإعاشة خلاوي القرآن بمحليات شمال كردفان.

* كل أنشطتك في الذكر وتحركاتك تبث لايف هل ذلك يعني البحث عن الترند والشو ؟
ـــ معاي ناس متابعين معاي في أوربا بحبو بكونو متابعين تحركاتي كلها وفي مبادرات أنا بعملا على أساس الناس تعاين أنا عملت شنو ويعملوا زيها ، زي محاربة العطش وبحاول الفت انتباه الناس والمغتربين يرسلو لـ أهلهم هنا يعملوا الحاجة دي.

*حال البلد ؟
ــ ربنا يتغمدو برحمتو.

* البفرح في البلد شنو في زحمة المواجع دي ؟
ــ الحاجة الوحيدة البتخلينا لسا بنفرح إنو في وطن لسا ما فقدناهو.

*وهل في احتمال نفقدوا ؟
ـــ بين لحظة والتانية.

*السياسيون رأيك فيهم شنو ؟
ـــ ما في جديد ياهم بنفس طبع القدام أحمد وحاج أحمد.

*إنتو كشيوخ بتناصحوهم ؟
ــ لينا بس الدعاء.

*قلت ما عندك علاقة بالسياسة لكن كمواطن رأيك شنو في الأزمة الحاصلة ؟
ــ الناس كان ما اتحدت وصفت جواها وراعت للوطن وتركت المصالح الشخصية هنشوف أسوأ من كدا.

*هل ممكن نقول السياسيين أنانيين ؟
ــ السياسيين أنانيين جدا المفروض أي واحد في السياسة ياخد ليهو فترة معينة وبعداك يجي غيرو.

*عمر البشير ؟
ــ خلاص زمن وانتهى قل اللهم مالك الملك تؤتي الملك لمن تشاء وتنزع الملك ممن تشاء.

*الراحل الصادق المهدي ؟
ــ فقدنا عقلية عالمية.

*الترابي ؟ٍ
ــ فقدنا رجل يشار إليه بالبنان.

*الميرغني ؟
ـــ أملنا في رجل ذي خبرة ومكانة كبير جدا.

*عبد الفتاح البرهان ؟
ــ ربنا يثبتو ويجعلو سند للبلد.

*حميدتي ؟
ـــ الدينمو المحرك ورجل صادق في كلمتو.

*من الذكريات لسا في البال شنو ؟
ــ بدون وظيفة رسمية قدرت رجعت العلاقة بين السودان والإمارات.

*شيخ الأمين يمتد بعلاقات مع كل الرموز بالمجتمع السوداني ؟
ــ العلاقات مهمة والحمد لله والمسيد يسع الكل والحمد لله بنعرف كل الناس من السياسيين والفنانين والرياضيين والمسيد لامي الكيزان علي الشيوعيين على القحاتة على الختمية على ناس الأمة.

*السر شنو في كل العلاقات دي ؟
ــ المسيد يجمع كل طوائف المجتمع.

*في ناس اتهموك قبل بالماسونية ؟
ــ البتهمو ديل زاتم كدا يجي يورونا يعني شنو الماسونية دي عشان أنا أجاوب.

*السودانيون في منصات التواصل الاجتماعي شنو ؟
ــ للأسف اهتماماتم في الأسافير (فلان عمل وفلان سوا ) شيخ الامين عمل عيد ميلادو وعندو سفرة بياكل فيها .. يعني لو مرقت برا البلد هتلقى الناس اتجاوز الفيس والواتساب زاتو.

* قبل كدا عملت محاضرات عن مكافحة المخدرات ؟
ــ الناس حقو بدل يقعدو في الفيس والواتساب يتونسو ويتريقو يوجهو بعض ويقدمو رسائل توعوية لمكافحة المخدرات الهي منتشرة بشدة.

* ثورة ديسمبر ؟
ـــ ثورة حقيقية لشباب كانوا عايزين يغيروا البلد لكن للأسف السياسيين ضيعوا البلد وضيعوا جهود الشباب وما أدوهم فرصة بدل نبني بيهم جيل هدمناهم والأحزاب صفت بيهم حساباتم السياسية.

*بتكون سمعت بالتسوية والحل السياسي الرائج الأيام دي تعليقك عليها شنو ؟
ــ نحن ما عندنا شغل بنجتمع عليهو بدل الناس تقيف مع التسوية وأي حل تستقر بيهو البلد شغالين مناكفات وحفر.

*الحفر قاصد بيهو شنو ؟
ــ نكسر مجاديف بعض.

*الحفر منتشر يعني في البلد ؟
= أكبر سوق في البلد (الحفر لبعض).

* نصيحتك للشباب شنو ؟
ــ اتعلموا الوطنية ويحبوا البلد ونحب بعض نحن الشعب الوحيد البشتم بلدو.

*الإعلام السوداني رأيك فيهو شنو ؟
ــ قوي لكن توجيه خطأ.

* لمن تقرأ في الكتاب الصحافيين ؟
= اقرأ لكثيرين والوسط الصحفي لدي فيه علاقات واسعة وممتدة رغم دخول بعض الأقلام التي لا تفقه شي وتستعمل الصحافة تصفية للحسابات.

نقلا عن الانتباهة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى