السماني عوض الله يكتب : “اللستك طرشق”

الخرطوم الحاكم نيوز

اطمأن حاج حمد على اخلاق السائق ابراهيم وقام بتسليمه مفتاح شاحنته التي اشتراها جديدة كحصاد لغربته التي أمتدت سنوات عديدة وقرر الاستقرار في البلد.

ابراهيم استلم مفتاح الشاحنة وهو مبسوط ولكنه سرعان ما تحولت سعادته لنكد ومبيت في الطريق بين عطبرة وهيأ ومرات بين الخوي والنهود ليس بسبب عطب في ماكينة الشاحنة ولكن ظل يفقد الإطارات وطرشقتها وكسر عمود الجنب ومرات الجربكس مما كلفت حاج حمد أموال طائلة والسائق ابراهيم من جهته يشكو من الشارع لانه محفر….

جلس حاج حمد يفكر في الأمر وسأل ابراهيم عن السبب… وتصاعدت المشكلة بينهما حيث اتهم حاج حمد السائق ابراهيم بالتعمد برمي الشاحنة في الحفر الموجودة على الطريق.. لكن السائق ابراهيم وبحسن نية أراد أن يكشف حرصه على الشاحنة وأنه لا يريد أن يكلفه كثيرا في الصيانة والاسبير فدار بينهما الحوار التالي :

حاج حمد : انت يا ابراهيم زول ما مسوؤل ومهمل وانت ياخي عاوز تدمرني!

ابراهيم : علي الطلاق يا حاج كلامك دا ما صحيح وانا اكتر حرصا منك على الشاحنة!

حاج حمد : كيف احرص مني وكل يوم كاسر في الشاحنة عمود جنب واللساتك يوميا تشتري جوز وثلاثة جوز وين حرصك؟؟

ابراهيم : عشان حريص اقول ليك انا بعبئ جاز بخمسين الف من عطبرة وبوصل بورتسودان بشحن الشاحنة دي لمن تقول بس وبركب الشارع.. على الطلاق اشحنها لامن ناس الشاحنات التانية يحسدوني عليها لأنها بملاها فل عشان أوفر الجاز وبدل شحنة واحدة بشيلها شحنتين وشحنتين ونص مرات!

حاج حمد : يعني بدل تشيلها شحنة تقوم تتدبل الشحن….؟ انت عارف انو الحمولة المسموح بيها في السودان ٤٨ طن!! حمولة شاحنتي ٦٠ طن انت معناها بتشيلها ٨٠ لي ٩٠ طن؟

ابراهيم : مرات ١٢٠ طن حرم.

حاج حمد: وناس الطرق ما بسألوكم ؟

ابراهيم : والله بكبرها منهم ومرات يقطعونا إيصال . ومرات لمن نجي بالقرب من محطاتهم في الشوارع بنزوغ منهم او كبرناها عديييييل!!!

حاج حمد : يا ابني انت بالطريقة دي ارتكبت عدة جرائم في حقي انا كمالك الشاحنة دي وفي حق الوطن وفي حق الاقتصاد وفي حق الشارع نفسه وفي حق المواطن.

ابراهيم : كيف يعني!؟

حاج حمد : ايوااا.. اوريك… انت بتشحن حمولة زائدة اكتر من ٥٦ طن.. الحمولة دي بتأثر على الشارع وبتعمل فيه حفر وتحصل التصدعات في الشارع.. عشان الحكومة او ناس هيئة الطرق يجوا يصينوها بتكلفهم قروش كتيييرة وهي خصما على التنمية وبكون همهم صيانة باستمرار بسبب هذه الحمولة الكبيرة

وتاني حاجة الحفرة الانت اتسببت فيها بجي سائق اخر بقع فيها وعربيته ح تتقلب وانقلبت معناها ماتوا ناس بسببك انت… وتالت حاجة يا ابراهيم الموازين العملوها في الشارع دي ما عشان يدفعوكم قروش.. عشان يضبطوا الحمولات الزائدة دي….. فهمت علي!؟

ابراهيم : اااه.. استغفر الله العظيم ربي يغفر لي ويسامحني… والله انا ما كنت فاكر انو الشحنات دي بتاثر على الشارع ولا مفتكر انا سبب في الحفر دي.. وكنت مفتكر انو الحفر دي بتحصل عشان ناس الطرق شغلتهم ما نجيضة.. لكن يا حاج حمد ربنا يجزيك خير على نصيحتك دي ومن الليلة انا واصحابي البعرفهم انو الشاحنة دي تاني ما تشيل كيلو وااااحد زيادة من الحمولة المسموح بيها مهما كان عشان ما نحفر شوارع بلدنا وندمر بنيتنا التحتية… ونصيحتي لكل سواقين الشاحنات التزموا بالحمولة المسموح بيها بس

الحاكم نيوز وجهة جديدة في عالم الصحافة الرقمية المتطورة... سرعة اكتر مصداقية اكتر دقة وانتشار للخبر والإعلان ..™

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى