نهر النيل حوربت من الإنقاذ وحكومة الثورة …..
الجيش المابقيف معاهو ندمان..
نظام الإخوان المسلمين انتهى منذ 1999
منو المشارك الإنقاذ
حوار همام محمد الفاتح
مصلح نصار الرشيدي هو أحد الذين أثاروا الجدل في الفتره الاخيره الماضية بسبب تغريداته المشاترة في السوشال ميديا ومعاداته لدوله الإمارات العربية المتحدة بصورة واضحة وصريحة هو من زعماء قبيله الرشايدة في السودان يسكن نهر النيل زاره البرهان في معقل دار جعل بشندي لديه كثير من من المعلومات عن الوضع السياسي الراهن… لديه أسرار منعنا من نشرها للإعلام إلى مضابط الحوار :
_مرحب بيك الأخ مصلح نصار_؟
مرحب بيك الأخ همام وسعيد جداً بيك لي نتناقش في مايصلح البلاد والعباد.
_مارأيك في الإجراءات التصحيحية للجنرال البرهان_؟
هو تأخر كثيراً لتقديراته في الوقت وهي خطوة شجاعة جداً للسيد القائد العام لأن البلاد متجه نحو انفجار قبلي وحزبي وتكتلات وحرب محاور قد تؤدي إلى تقسيم البلاد الحمد لله انها حدثت الإجراءات ندعو الشعب السوداني للاتفاف حول القرارات التصحيحية من أجل تحول ديمقراطي شفاف يصب في مصلحه البلاد.
_ماهو رأيكم انتم كإدارة أهلية وعمدة ومشايخ؟_
لااتحدث بصفه إدارة اهلية انا ناشط سياسي دعم التحول الديمقراطي مطلوب للأشياء كثيرة جداً منها التدخلات والمطامع الدولية انحنا ماعندنا هدف للمكاسب شخصية نحنا همنا البلاد تسير إلى الأمام وماعايزين حاجه ومحتاجين للشئ واجب على كل مواطن سوداني يدعم تصحيح المسار الديمقراطي انحنا نتحدث ليس عبر منصات حزبيه أو غيره استشعرنا أن في خطر على البلاد أهم شي التوافق بين كل الأطراف.
_ماهو السر في عداوتك مع دولة الإمارات العربية المتحدة؟_
أنا ماعندي عداوة مع دولة الإمارات العربية دولة الإمارات دولة عظيمه مؤسسها له شأن كبير في مايختص مابين العلاقات الدبلوماسية والشعبيه ولكن اخوانا الحكام في الإمارات أو ممثليهم في السودان عندهم تدخلات مكشوفة للناس نحن قواتنا تقاتل في الفشقه وهم عملوا مبادرة لكي يستولوا على الفشقه ومطامعهم دائما لهم يدين يد سفلي ويد عليا من الممكن أن يكونوا داعمين لك وداعمين للطرف الآخر التدخلات المباشرة والمكشوفه لمنادبيهم هي التي تستدعي التتدخل لحماية السيادة الوطنية.
_حتى السعودية تتدخل في الشئون الداخلية في السودان_؟
السعودية أرض الحرمين وانا مراقب للحركة الدبلوماسية كلها بصفتي ناشط سياسي السعودية لديها أعمال في حد المعقول في حد عدم التدخل في السياسات السفارة السعودية اجرائتها تتحول إلى المؤسسات الحكومية….السفارات لديها أعمال استخباراتية لصالح بلدانها وهذا حق مشروع،ولو شفنا تدخل واضح ومكشوف من السعوديين نقف ضدهم بلا شك ذي ماوفقنا ضد السفير البريطاني السابق عرفان صديق كان لديه تدخلات سافره… نتمنا أن ترفع الامارات التدخل والعداء ليس عداء شخصي ماحدث لشبابنا الذين خدعوهم لعمل بشركة ثم ابتعاثهم للحرب في ليبيا هذا غلط كبير وفادح من حكومة الإمارات العربية المتحدة وبعد هذا لم تعتذر للشعب السوداني وهذه واحده من سلبيات الإمارات نحن نقول لكم نحن ليس ضدكم انتم شعب كريم وطيب ولدينا سودانيين كثر يقيمون في الإمارات سياسة الإمارات تجاه السودان فيها استهداف واضح للدين والإسلام الشعب السوداني مااخوان مسلمين بل هو مسلم بالفطره ماممكن عشان انته ضد فكره الإخوان المسلمين تعادي الإسلام… والإخوان المسلمين في السودان يختلفون تمام عن الاخوان المسلمين في بقية العالم حصل انفصال منذ عهد حسن البنا كان هنالك المؤتمر الشعبي الإسلامي سياسه الاخو المسلم في السودان ليس كسايسه الآخو المسلم في البلدان الأخرى، انا مااخو مسلم ولدي علاقات مع كافة الأحزاب السياسية شيوعين واسلاميين وبعثيين وتم اعتقالي في عهد البشير لي استضافتي لهيئة شؤون الأنصار بشندي وايضا لدي علاقه بالختميه والصوفية وغيروا…. ندعو الشعب السوداني لنبذ القبلي والجهوي.
_مارأيك في الفترة السابقة بقيادة عبد الله حمدوك_؟
حمدوك رجل بسيط وهادي وفيه أخلاق السوداني البسيط التي سببت له استغلال من الحوليه وحول قرنيين شيطان ادؤا إلى تشويه صورته ودي ظاهرة خطيره ماجاب حكام اداروا أقاليم السودان بصورة المطلوبه نعيب عليه أيضا أنه في فتره حصلت مشاكل كثيره في الولايات لم يقم بزيارتها مثال نهر النيل ماكلها عمر البشير ولانافع على نافع. انحنا في نهر النيل انا معتقل اكتر من 20 مره في عهد الإنقاذ ماممكن أن تعادي شعب أو منطقه بأكملها الثورة قامت من عطبره، في العام 2018 زارونا ناس السفارة الأمريكية في إفطار رمضان في شندي وشاهدوا التنوع والحضور النوعي من قبائل السودان المتعدده بما فيهم المسيحيين يقدموا للناس ماء الشرب وكانت قبائل الانقسنا وجبال النوبه ودارفور حضور أيضا أكثر من 2 الف شخص اندهشوا الأمريكان قالوا إن هنالك تنوع وتهميش في الولاية وتحدثوا كلام غير الكلام البيعكسوا الإعلام المضلل وللأسف اتصل بي قيادي يساري معروف اعاب على قال لي ليه ناس ذي ديل تخلوهم إجوا عشان نحنا مضخمين والناس ديل اخدوا الثروة وانت بكسروا في خطنا وافتكرني للتسامحي مع كل الاطراف اني معهم قال لي خرب لهم خطهم بتاع التميز العنصري والتطهير العرقي من أهل نهر النيل والشمال اخدوا الثروة والسلطه ونقول لهم نخبة من نهر النيل هم الظلموا أنفسهم وبلادهم.
_نهر النيل متدني في الخدمات والبنيه التحتية_؟
نهر النيل حوربت من حكومة الثوره والإنقاذ نفسها حاربت نهر النيل لأن حكام الإنقاذ بفتكروا أن صناع القرار من نهر النيل افتكروا انوا أمشوا المناطق الأخرى لكي لايقولوا نموا مناطقهم ونسوا الباقين كالمثل السوداني “كانوا ضل دوم” وظلموا أنفسهم واهاليهم وربنا يهديهم وأصلح شان البلاد.
_رسالة للفريق أول عبد الفتاح البرهان_؟
اخونا الفريق أول البرهان بكل تأكيد من لم يحترم جيشوا يراجع رجولته ووطنيته احنا بنقول ليهم من يهم بأمر البلاد والعباد نحنا داعمين ليهو نحن ضد الانقلابات أو أي هيمنه عسكرية على السلطه نحنا بي ندعم التحول الديمقراطي الجيش لازم يكون موجود الآن الوضع أخطر مايتخيل اي انسان لأن هنالك حرب محاور خارجية لديها أطماع في السودان بما فيها التوجهات الاعلاميه الموجودة سواء كان بعض الدول يرى نفسه غير موجود في الصراع في السودان يضغط عشان يجد نفسه والآخر يجد نفسه ويدعم؟ وهذه هي الحرب المحوريه الموجودة في السودان والخطر يستوجب استيقاظ القوات المسلحة والشرطة والدعم السريع وجهاز المخابرات وان يكونوا حذرين والا لن يجدوا وطن يتقاتلوا عليه.
_مارأيك في امهال السفير البريطاني 21 يوم أو مغادرة البلاد_؟
ماعندي خبر ده في حد زاتو يدعم السيادة الوطنية لما اقول برهان أمهل سفير فتره معناها ماشين في الطريق الصحيح لينا الحق نعتز بقيادتنا نقول للبرهان امشي نحن وراك وداعمين ليك وراك شعب ماتنتبه للإعلام المضلل وامشي لانو السودان محتاج ليك.
_هل تفتكر تصحيح مسار الثورة يرجع الإخوان المسلمين لمقاليد الحكن_؟
مافي نظام اخوان مسلمين أصلاً نظام الإخوان انتهى منذ 1999 مافي زول ماشارك الإنقاذ حتى 4 طويلة مابعدين من الإنقاذ اي زول تطارح نفسو مابعيد من الإنقاذ دي شماعة
_رسالة للشعب السوداني_؟
نقول ليهم ماتساقوا بالخلا سواقت الخلا دمرت الناس واضرت بالبلاد الناس تتحد في التوافق السياسي الناس تعرف أن هذا الشعب غير شعوب العالم عندنا صفات طيبه وكريمه الزول في الشارع تقول ليه اتفضل.
__هل تفتكر أحزاب 4 طويله ترجع وتشارك في المجلس التشريعي_؟
والله شوف انا ماضد زول انا مع التوافق الوطني التجمع الاتحادي ماعندهم وزن لكن نقول عندهم الحق اتكلموا معاهم الخطأ أن تضع شخص في المكان الغير مناسب لذلك نقول ربنا اهديهم الناس تنادي بالحوار والمصالحة وعندنا علاقات كثيره بيهم.
_حدثنا عن قبيله الرشايدة في السودان_؟
قبيله الرشايدة تمتد من ساحل البحر الأحمر وكسلا ونهر النيل ومنطقة شمال بحري آخر هجره عربيه أتت إلى السودان عندها عادات معروفه للشعب السوداني وهي لديها وجود في 12 دوله وعندها اسهاماتها.
_ماهي اسهاماتها_؟
دعم عجله الاقتصاد الوطني بما يختص منقبي الذهب وموردين ومصدرين الماشيه وعندهم إسهامات مقدرة وعندهم وجودهم لكن لما جاءت حكومة حمدوك بي افتكروا انو الرشيادة حتى في المشاركة في الوثيقة الدستورية منعوا فرقتنا الموسيقية من المشاركة… ده اداهم الدافع أن العربات تجي اكتر من 200 عربيه في اعتصام القصر لانو ماادوهم حقهم ومااحترموهم وهم اقتصاديين مؤثريين بشكل مباشر الرشيادة اندمجوا مع الناس وتزاوجوا والحمد لله ماشين كويس كل قبائل الرشيادة داعمين للقرارات اضرب ليك زول اقول ليك انا جاهز دايرين شنو انا ارسل…. ف ده شغل كبير والفترة الجايه لازم اكونوا موجودين وعندنا تواصلات مع تنظيمات واخوانا في شركاء السلام ناسنا مني اركو مناوي زارني في المنزل في شندي و هذا شعور طيب منه وحركة العدل والمساواة متواصله معانا وعندنا وجود في دارفور قبيله موجودة كبيرة جداً لها كيانها… حتى متداخلين مع تشاد دي اولاد راشد اولاد عمنا على تنسيق تام معاهم حارتهم حارتنا وباردتهم باردتنا.
_ختما الفرصه لك_؟
انا ماعندي شي اقول انصح اخوانا في السلطه الرابعه التشفي ماكويس الناس البتكلم عن القوات المسلحة مافي زول اتكلموا عن أمو وابوهو مافي زول أتطلع سر اسرتوا ونقول ليهم الجيش ده المابقيف معاهو ندمان نحنا ندعموا البلد مستهدفه في جيشا بارك الله فيك وجزاك الله خير.
