كتبت رشا مصطفي اسماعيل
مع اقتراب اليوم العالمي للإعاقة يوم 3/12 من كل عام ويصادف الخميس باذن الله حأرجع اكرر و اذكر و اوضح شوية حاجات لاني في اليوم ده ناويه ابتهج و استقبل المعايدات و اشوف و لو 1% من حقوقنا واقع معاش المهم:
نحنا راضين تماماً باعاقتنا و ما مشكلتنا الاعاقه مشكلتنا المعيقات..
نحنا بشر زي كل البشر و اختلافنا طبيعي زي ما في الطويل و القصير و السمين و الضعيف في الما بتحرك برجولو و الما بسمع والما بشوف و ما بتكلم..
نحنا ما خجلانين من اعاقتنا عشان تجي ناس تخجل مننا و تدسنا و غيرو..
نحنا ما عالة و لا رمز للقعود و الكسل و لو حاجه زي دي حصلت معناها في حواجز ما اكتر عدم مواصلات عدم تأهيل مبنى..الخ.
اهلنا ياخوانا ارحموهم و ما تعايروهم بينا لانهم عارفننا و بحبونا زيهم زي اي والدين و اخوان في الدنيا دي فما
تزيدوها عليهم..
نحنا ما بركة و لا ملائكة منزلين نحنا بشر عاديين عندنا عيوبنا و مميزاتنا و كلوو فينا السمح و الكعب..
لما تشوفو لينا صوره و لا بوست كاتبنو برانا معناها كسرنا الف حاجز لا عشان نلم لايكات و لا تعاطف من الناس بل احياناً بوستات كتيره بنتراجع عن كتابتها عشان ما توجع ليها قلب زول و شكراً و عفواً
بحبكم جدا جدا
