رجل اعمال سوداني يكشف سر لأول مرة عن “معاوية البرير”

الخرطوم : الحاكم نيوز

كتب رجل الاعمال الشاب ابراهيم الشيخ سيداحمد صاحب شركات العقارات في تركيا مقالاً على صفحته في فيس بوك حول رجل البر والإحسان ورجل الأعمال الناجح معاوية البرير قال فيه :

معاوية البرير…

رجل أعمال وإسم معروف لمعظم السودانيين … منذ وأنا طفل وصغير في عمري كنت بسمع عنه وعن مصانعه وشركاته … وأكتر حاجة كانت بتعجبني جدآ كلمة إحدى مجموعة شركات مجموعة معاوية البرير
كان بالنسبة لي حلم إنه في يوم يكون عندي شركات وموظفين مثله وأقول إحدى مجموعة شركات إبراهيم الشيخ وإجتهدت جدآ علشان أعمل الحاجة دي … والحمدلله قدرت بتوفيق من الله وحسن ظني فيه أن أحقق جزء من أحلامي

قابلته قبل فترة في مكتبه مع صديقي وأخي العزيز مصعب محمود في الخرطوم وعندما دخلت مكتبه ما كان بفصلنا منه غير اسانسير طلعنا به و سكرتيره قابلنا بكل بشاشة والأجمل حضوره بنفسه لإستقبالنا لمكتبه …

كنت مبسوط جدآ لأنه حأشوف إنسان كنت بشوف إسمه فقط في الإعلانات والدعايات في التلفزيون والشوارع وكلنا متزكرين عصير شامبيون وكابتن ماجد وغيرهم من المنتجات الموجودة في بيت كل سوداني … اتكلمنا عن تركيا ولكن قدر ما حاولت أقنعه بتركيا والإستثمار فيها الراجل كان مليان حب للسودان وأهله … 🇸 ووعدني بزيارة لتركيا

دخل علينا واحد من الناس البعملو معاه في الشركة وكان بحاول يقنعه يشتري سيارة فارهة زي الرولز رويس … وانا كمان حاولت أشجعه للفكرة لأنو حلم من أحلامي برضو 😅 وكمان لأنو إنسان ناجح وبستحق يكافئ نفسه … لكن رده كان مختلف جدآ عننا وقال يا جماعة أنحنا ناس إجتماعيين بنزور أهلنا والناس الحولنا والناس أوضاعها بقت تعبانة ومحتاجة فمايصح إنو الزول يجي داخل على الناس بعربية تمنها مليون دولار إحترامآ وتقديرآ
للناس … سكت بعدها وعرفت إنو الراجل عندو مبادئ مختلفة وفهم مختلف جدآ عن فهمنا

رسالة حب :
السودان لسة بخير وفيه ناس مستمرين في نجاحاتهم برغم الظروف الصعبة الماري بيها وبساعدو ناس كتيرة وفاتحين بيوت آلاف من العاملين والموظفين وبيهم ربنا برزقهم وبزيدهم وعمل الخير بسبقهم

أخيرآ:
بتمنى دايما ندعم الناجح علشان يواصل في نجاحه ونقيف مع المحتاج علشان يمشي لي قدام … ونكرم ونفخر ونتفخر بي الناس النجحت في حياتها 💚 لانو ممكن يكونو نور وشمعة تضئ الطريق لي غيرهم في زمن بقى الظلام للأسف مسيطر
على كل حاجة …

في ناس بتحب الخير لبعض وحتلاقوهم في التعليقات فندعم بعض ونكون بعيدين عن الحسد والحقد والتنمر علشان تعليقاتنا بتعكس مافي دواخلنا

بكرة أكيد حيكون أحلى وأجمل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى