كن إيجابيا تحلو لك الحياه..لاتكن متشائما فنحن نجذب مانقوله ونفكر به..دايما خليك متفائل وظن الخير بالله…..اساسا اي انسان عندو طاقه سلبية وطاقه إيجابية وعلي حسب تفكيرك وكلامك حياتك بتمشي يعني أغلب مشاكلنا بنكون احنا السبب فيها بتفكيرنا المحبط والسلبي ودا شعور بجذب الحظ السئ وأذا راجعنا حساباتنا نلقى ده كله بسبب سؤ الظن لازم نعرف كيف نغير حياتنا للأفضل ونصل للحاجه العايزنها يعني مثلا لو عندي صاحبه سلبيه متشائمه احاول بقدر المستطاع ابعد منها واقرب من ناس ايجابيين وبحبو الحياه والسعاده .
ولازم برضو نتعلم نتقبل ونحب الغير ونتمني ليهم الخير عشان الخير يرجع لينا ونتصالح مع نفسنا ونبعد من الغيره والحسد والحقد لأنها دي من الحاجات السلبيه البتدمر الانسان….الفكرة كلها اننا نعيش حياه راضيين عنها مبسوطين فيها بعيدين كل البعد عن المشاكل النفسيه والاكتئاب ودي كلها مشاكل داخليه حلولها في ايدينا بالوعي والادراك…
بعض الاحيان بيكونوا في ناس حولنا ماعايزين لينا الخير وبعاينو لينا في حياتنا وبتكلموا من الداخل ده برضو ليهو تاثير كبير علينا وعليهم يعني لو هم ماعايزين لينا الخير بجذبوا وصدي الحاجة دي برجع لينا بحاجات ماحلوة بكلامهم عننا بالذات لوكانوا قريبين مننا فعشان كده لازم نكون محيطين بالشخصيات الجميلة البتدينا قوه وحب وجمال للحياة ومانتاثر بالناس السلبيين وممكن كلامهم ناخدو علي محمل الضحك ومانركز فيهو الحياة بسيطه جدا ومحتاجة مننا شويه حاجات نساعد بيها نفسنا ونساعد بيها بعض عشان تكون حلوة ومرضية ومريحة وفيها استقرار نفسي وذهني
ولازم كمان نعرف نتعامل مع بعض كيف… يعني مع ناس البيت الاصدقاء الأحباب والناس القريبين مننا اولادنا ولازم نمثل الدعم ليهم بكلامنا الحلو (زي مابقولو الكلمه السمحه جواز سفر)المعني كبير جدا وعندو ابعاد وبدل على انوا احنا بكلامنا ممكن نغير حياة ناس كتيرة محتاجين لي دعم ولي قوه …كلامك عنوان شخصيتك وتربيتك خليك ايجابي ماتحبط نفسك ولاتحبط غيرك الخير كلو قدامك باذن الله
وأخيرا
فكرو بحب بإيجابية بتفاؤل و بحسن ظن في الله وحنكون بإذن الله زي الورد
-
-
-
-
-
-
