الخرطوم الحاكم نيوز
في اجمل مجادعه بين الشاعر صديق الجعفري والشاعره توسل احمد علي مواقع التواصل الاجتماعي
صديق الجعفري
نقول العبّا من بحر السماحه وكيّل
ولا الزرّف الدمعات وليهن سيّل
الشالوهو لي تالا المغارب ميّل
ان قمت وقعد انا ليهو يوت بتخيّل
توسل احمد
قول احسن بريدك.. وليا صون واطراني
ماتزرف دموعك غير لحب وتفاني
انت السمحه فيك نضمه وكتابه وحاني
ان عيّرت كلماتك بتنعاد تااااااااني
صديق الجعفري
كان الريده قول انا بملا بيكي مكاتب
الا الريده تقدير بس بعرفو الكاتب
دام السمحه لي شان مااعترف بتعاتب
اعلمي اني فتّ حدود هواكي مراتب
توسل احمد
اصلك في الغرام والريده اعلي مثال
ومااظن زي كلامك في الكلام اتقال
كان بالايد وصالك يالنجيض والمال
بجيكا واملا دنياك بالفرح والفال
صديق الجعفري
زيا زيّك ان القسمه جابت ايدو
بحلف انو بصبح ريدي وايضا سيدو
غير تدليلو هو الفاق في السماحه نديدو
كل القاصدو بالشين انا بنزّل جيدو
توسل احمد
وزيك يالرزين مااظن اقابل تاني
وانا ممنوعه من الريد كفاكا اغاني
معصومه ومحصّنه بي حكم رباني
لكن زي كلامك اصلو مالاقاني
صديق الجعفري
كفاني الريده في قلبي وكفاكي تشوفي
وعدا اصون امانتك املا بيك كل جوفي
دام مستوره واتجاوب سؤالي وخوفي
اهني واسعدي وحارسك يمين بسيوفي
توسل احمد
تسلم يالمعتّق بالفهم والراي
ورويان بالرجاله ومابتدورو ازاي
سعيده شديد معاك بي نمي والدوباي
وواثقه الجعفري بي سيفو باقي وراي
صديق الجعفري
سعادتي اشوف حروفك واستريح من همّي
والنضم انتي ستو وانتي زينه نمّي
ياالاسمك بيسعد بي النطق ليو فمّي
اقدلي واثقه بفديك حتي لو بي دمي
توسل احمد
نفس احساسك احساسي بشعرك ونمك
وبتمني السرور يغشاكا ويزول همك
اكتب واسعد الناس بالدرر من فمك
ويسلم عمرك اااارايق ويسلم دمك
صديق الجعفري
سمح ان دايره عبّي وكيلي هاكي النمه
حرفا جابك اااسمحه بنكترو ضمه
فوق للهيبه والنور الكساكي وعمّه
طيبه وهاديه والزوق من بحورك تمّه
توسل احمد
مابفتر من النضم والحديث في حقك
وبي اعجابي بي حروفك بيشهد ربك
يالنضمك مدوزن بالشهد متلبك
قصّر مابدور فوق الكلام نتشبك
صديق الجعفري
شن القول أكان الشايفو غير الشايفه
حرفك نفحه الدغش التلثمك وطايفه
حروفي معاكي يالماهن وصوفك زايفه
منك ومن جمال نضمك بترجف خايفه
د٠ ٩
توسل احمد
مازي خوفي من الغوص معاك في نضمك
شايفه الشايفو والله ومقدّره نمّك
الله يوفقك في الدنيا قط مايضّمك
وبي غيره الرجال يكفيني رايك وفهمك
صديق الجعفري
تسعدي ديمه في دنياك ويارب تهني
اكافيك ربي بالتوفيق وثمرتو تجني
العاجبني فيك غير الجمال العجني
ملكه وبت ملوك من كردفان بت وطني
صديق الجعفري _ توسل احمد
30 مايو 2021
