الخرطوم الحاكم نيوز
نشرت الشاعرة توسل أحمد قصيدة جديدة تحمل بين شعر الحماسة والتمسك بالشعائر الدينية
وقالت فيها
سودانيه في عيوني المحاسن ظاهره
راكزه وبت بلد حره وعفيفه وطاهره
مابتلقاني لي عادات بلدنا مشاتره
غاليه عزيزه سمحه وسمرا صيده ونافره
حافظاها الوصايا وحافظه قول حبوبه
بتنا في البلود حاشاها تقلع توبه
في الليل البهيم بتجيب فطيرا وروبه
تكرم للضيوف تلقاها وقت الحوبه
وكمان في الرجال مابرضي غير سوداني
اسمر دمو حار حاشاهو مابياذاني
فيهو بشوف هنايا وغنوتي والحاني
رايدني ومحال يقسي ويصد ينساني
ليه انا باقيه مرسي وباقي لي القيف
حلوه حياتنا خاليه من الخداع والزيف
ساعه الحاره راكز وفي وراهو بقيف
حاميني ودا طبعو الاصلي ماتكليف
السمرا ام سماح اسمي وشعاري العفه
في نص الخلوق حاشايا مابتخفه
راكزه وبت رجال دغريه خاتيه اللفه
خاته البال دوام وورا الوضوح بنصفه
رايقه وبت بلد محتشمه لافه الطرحه
بالفعل السمح انا راسمه أجمل لوحه
الجود والكرم في رحاب بلدنا السمحه
هاكم عنها وعن طيب صفاتا نفحه
وارثين الكتاب والسنه لينا شعار
وفي قانونا ضيفنا بكون هو سيد الدار
بنراعي الاصول نحفظ حقوق الجار
ووقت الحاره أطفالنا بيخوضو النار
