محمد سر الختم السنهوري يكتب: الحب أمانة.. ما لعبة

الحب شنو بالنسبة ليك؟

لو بتحبها بجد، مافي شيء حيقيف في طريق وصولك ليها.. لا ظروف، لا مسافات، لا كلام ناس.

البحب بجد بصون.. بحترم.. بحافظ.

ما بستغلها ويستغل حبها وضعفها وثقتها فيه.
ما بكسر قلبها ويحطمها وبعد ما ياخد العايزو يرميها.

نحن عندنا عادة قبيحة ومصيبة كبيرة اسمها *الكيل بمكيالين*.

الولد يغلط نقول ليه “ولد ما بعيبو شي”، والبت تغلط نذبحها ونعدمها ونمسح بيها الأرض.
انتو الاتنين *شركاء في الغلط*.. الاتنين عصيتو ربنا.. الاتنين وقعتو في الحرام.

الحرام ما بتجزأ.. ما ببقى حرام للمرأة وحلال ليك.

كلو حرام. النظرة حرام عليك وعليها، اللمسة حرام عليك وعليها، الخلوة حرام عليك وعليها، العلاقة خارج إطار الزواج حرام عليك وعليها.

ما تبيحو لي نفسك وتحرمو عليها.

ما تبقى انت عامل فيها شيخ وواعظ وتحاكمها وتجلدها وانت شريكها في نفس الذنب.

ربنا قال: *”الزَّانِيَةُ وَالزَّانِي فَاجْلِدُوا كُلَّ وَاحِدٍ مِنْهُمَا”*.. بدأ بالزانية وبالزاني.. الاتنين سواء في العقاب، الاتنين سواء في الحساب.

دا ما دعوة مني للرذيلة.. لا والله.. دا تصحيح مسار.

عايز تصحح؟ تعال من الباب.

الحب الحقيقي ما في الرسائل نص الليل، ولا في الشقق المفروشة، ولا في الكلام المعسول عشان تصل لجسدها.

الحب الحقيقي دق باب أهلها.. عقد شرعي.. إشهار.. مسؤولية.

يا أختي.. البقول ليك بحبك وما قادر يتقدم ليك، وهو قادر، دا كذاب ومستغل. البيحبك بجد بخاف عليك من النار قبل ما يخاف عليك من كلام الناس.

ويا أخوي.. زي ما عندك أخوات بتخاف عليهم، بنات الناس برضو عندهم أهل بخافو عليهم. *كما تدين تدان*.

العادات بتقول البت تغلط نقتلها، لكن الدين بقول *اتقوا الله في الضعيفين*.

صححو المفاهيم.. الحب ليس حراماً، الحرام هو ما نفعله باسم الحب.

الحب الحلال رزق.. والحرام ما بجيب إلا الندم وكسر القلوب وضياع الكرامة.

*صونها عشان ربنا يصونك.. واحترمها عشان ربنا يحترمك.*