الأيام دي منتشرة في الواتساب والفيس بوك إعلانات بتستغل مشكلة قطوعات الكهرباء وحاجة الناس للبدائل. الإعلانات دي بتروج لبيع منظومات طاقة شمسية بأسعار رخيصة جداً وبنظام أقساط وهمي. ومن أشهر الرسائل الحايمة هسي رسالة باسم جهة وهمية بتسمي نفسها “شركة الخندقاوي التجارية”.
الجهات دي بتغري الزول بعرض لمنظومة كاملة (ألواح، بطاريات، ومحول) بسعر أقل بكتير من سعر السوق. الهدف من السعر البسيط ده إنو يخلي المشتري يستعجل ويتخذ قرار سريع عشان خايف الفرصة تروح عليهو.
اللعبة بتكتمل لما يطلبوا منك تدفع مبلغ معين كمقدم، وبقولوا ليك إنو المبلغ ده حق الترحيل والتوصيل والتركيب عشان تأكد الحجز. وعشان يطمنوك، بيدعوا إنو عندهم مناديب ترحيل في كل الولايات بيوصلوا البضاعة لحدي باب البيت، وده اللي بيشجع الزول إنو يدفع.
بيطلبوا منك تحول المقدم ده بالتطبيقات البنكية (زي بنكك أو غيره) لحسابات في الغالب بتكون بأسماء أشخاص عاديين ما حسابات شركات رسمية. وبمجرد ما تحول القروش وترسل ليهم الإشعار في الواتساب، طوالي بيعملوا ليك حظر (بلوك) وبقطعوا التواصل، وتكتشف إنو مافي لا بضاعة لا مناديب من الأساس.
عشان كده، بننبه الناس كلها تاخد بالها وتبقى واعية. أوعك تحول أي قروش كعربون أو حق توصيل لأي جهة بتتواصل معاك بالإنترنت بس وما عندها محل أو مقر معروف. الشراء المضمون للطاقة الشمسية بكون بأنك تمشي براك لمعارض الشركات المعروفة، وتشوف الأجهزة بعينك على أرض الواقع، وتدفع قروشك وقت الاستلام، وتطالب بفاتورة رسمية وشهادة ضمان. يا ريت الناس تنشر التنبيه ده على أوسع نطاق عشان نحمي مجتمعنا من عمليات النصب دي.
*وعيك وقاية من الاحتيال*
اخوكم محمد مصطفى ود الزعيم…✍️
