نشرت الفنانة هدي عربي منشورا مثيرا على صفحتها في فيس بوك قالت فيه : والله يا جماعة عندي كلام واقف لي في حلقي من بدت الحرب. دي
وأضافت : قصة المساعدات ونشر الحوجات كل زول فهمه وتقديره بختلف ما بقدر انشر حوجة زول في مكان لحاجة في مكان تاني بفتكر انه كدة بعرض حياة زول تاني لي خطر ودي مسؤلية وحاجة تانية في ظل ظروف النهب دي ما ممكن اعلن عن صيدلية فاتحة او بقالة اعرض برضو الصيدلية والبقالة والناس الفيها لخطر
دي انا عن نفسي بخاف وبفكر وبهجس
وقالت عربي في منشور ها : الزول بقى ما عارف يعمل شنو افتكر القصة دي لو بقت في قروبات واتساب مضمونة افضل
كلنا ساكنين في مناطق مختلفة بس عندنا ناس ثقة في كذا محل
الزول لو حوجته في اطار المعارف ما قضت اشك انها تنقضي في فيسبوك في الفضاء الوااااااسع الفيهو كل انواع الناس دة القصة دي مخيفة شديد
وأوضحت ان الراجل قفل محله بي كوم تراب بسبب الفيسبوك بقى لفت انتباه واتنهب … كذا حالة اعلان لي بصات للسفر بقى فيها نصب واحتيال طال الاحتيال حتى تذاكر الطيران
يعني الحاجات بدل تكون مساعدة جابت ليها مصائب تانية في عز المصيبة الاصلاً حلت على البلد كلها
اتمنى يكون هاجس. عندي براي لكن برجع بقول في وقائع عززت هواجسي
وقالت هدي عربي ان الامر معقد وضعاف النفوس قللو المروة في الناس الحابة تخدم
يبقى الحل الناس تقيف مع بعض تساند بعض
زولك ما يحتاج يلجأ لفضاء مفتووووووح فيهو الصالح والطالح
حبو بعض
ساندو بعض عشان ع الاقل نضمن سلامة بعض
