يا جماعة، خلونا نتكلم بالواضح..
الرجولة الحقيقية ما إنك تخدع بت وتكسر قلبها وتفتخر قدام أصحابك إنك قدرت عليها..
الرجولة الحقيقية إنك تتذكر عرضك، أمك، أختك، قبل ما تمد يدك على عرض الناس.
البت القدامك دي ما جات من الشارع..
دي عندها أب من صغرو تعب وعرق عشان يأكلها حلال ويربيها تربية نضيفة..
عندها أم سهرت الليالي، دعت ليها، وعلمتها تكون ست بيت..
عندها أخ واقف في ضهرها وشايل همها..
هل بترضى الزول دا كلو ينهار بسبب نزوة منك؟ هل بترضى دموع أمها؟
اسمع القانون الإلهي الكوني دا كويس:
الزول البيحفر حفرة لبت الناس، أختو بتقع فيها.البيكسر قلب بت، ربنا بيرسل البيكسر قلب أختو.
البيهتك ستر بت، ربنا بهتك سترو ولو بعد حين.
كما تدين تدان، والدنيا دوارة، واللي بتعملو الليلة بتلقاهو بكرا في بيتك.
نحن نسينا حاجة اسمها “دين الستر”.
الستر دا دين، إن سترت بت الناس في ضعفها، ربنا بستر عرضك يوم تكون في أضعف حالاتك.. وإن فضحت، ربنا بفضحك ولو كنت في نص بيتك.
وتذكر القاعدة التي لا تتغير:
الذي لا ترضاه على أمك وأختك وزوجتك وبنتك، لا ترضاه على بنات الناس.
أنت الليلة بتقول بكل فخر: “أنا مستحيل أتزوج بت كنت بتكلم معاها”..
طيب خليك عارف، أنت حتتزوج بت كان غيرك بتكلم معاها، ويمكن عمل أكتر من الكلام.. ليه؟ لأن الجزاء من جنس العمل.
ونفس الشي ليك يا أختي..
ما تبيعي نفسك برخيص، ما تخلي كلمتين حلوات يخلوك تنسي تربية أهلك.. البيحبك بالجد، بجي الباب من بابو، بجي لأبوك، ما بجي ليك في نص الليل في الواتساب.
نصفكم الثاني حيكون بنفس أخلاقكم..
عايز زوجة صالحة ونضيفة وطاهرة؟ خليك أنت صالح ونضيف وطاهر أول..
الطيبون للطيبات، والخبيثون للخبيثات.. دا وعد رباني.
خافوا الله في بنات الناس..
والله لو تعلم البت قدر شنو أبوها بتألم لمن يسمع عنها كلمة بطالة، ما كانت رضت لنفسها كدا..
ولو تعلم الولد قدر شنو دعوة المظلومة بتطلع للسماء، ما كان ظلم.
في النهاية كلنا راجعين ليهو..
﴿ وَاتَّقُوا يَوْمًا تُرْجَعُونَ فِيهِ إِلَى اللَّهِ ثُمَّ تُوَفَّىٰ كُلُّ نَفْسٍ مَّا كَسَبَتْ وَهُمْ لَا يُظْلَمُونَ ﴾
اللهم استرنا واستر بناتنا وأخواتنا..
اللهم من أراد ببنات المسلمين سوءاً فاجعل كيده في نحره..
اللهم ارزق شبابنا العفة، وبناتنا الستر والحياء 🤲
