60 ألف نازح جراء أحداث العنف بالجنينة
دولاب العمل حيقيف
في قوات دعم سريع جاتنا من الفاشر ونيالا استفدنا منها في الاستقرار الحاصل الآن
الناس متوجسة لانو الأيام الفاتت حصلت فوضي شديدة
قنص وقتل وقفل للطرق
حوار : مهند عثمان
*بداية نرحب بك سعادة والي ولاية غرب دارفور الأستاذ محمد عبدالله الدومة ونشكر لك اتاحة هذه الفرصة لإجراء حوار معك*
شكراً
*شهدنا خلال الأيام الماضية أحداثا مؤسفة داخل مدينة الجنينة راح ضحيتها عدد من القتلي نسأل الله لهم المغفرة وعاجل الشفاء للجرحي والمصابين إذاً كيف هو الوضع الآن* ؟
طبعاً الوضع الآن تحت السيطرة من ناحية أمنية وجاتنا قوات من نيالا ومن الفاشر دعم سريع واستفدنا منها في الاستقرار الحاصل الآن و متوقع برضو في قوات. امبارح وصلت عشرين عربة من القوات المسلحة وعشرين عربة اخري قادمة من الخرطوم علي اي حال في قوات وصلوا لغاية كاس الآن وهم من الاحتياطي المركزي فيما اعتقد وبصفة عامه الوضع هسي مافي هجوم مافي إطلاق نار مافي اي حاجة الآن لكن الناس متوجسة طبعاً لانو الأيام الفاتت حصلت فوضى شديدة اااا قنص وقتل وقفل طرق عشان كده الناس متوجسة السوق فتح من أمس جزئيا والليله لانو يوم الجمعة ما افتكر حيفتح علي اي حال حيفتح إنشاء الله يوم السبت الشي التاني فيما يختص بقييد حركة المواطنين بموجب حالة الطوارئ رفعناها قبل يومين من 6 م الي 7 ص دا لحركة تقييد الناس وحسب التقييم الليله او بكره انشاء الله نشوف نفك الموضوع كلو ولا نقييد تاني من جديد تقييد جزئي برضو لانو لسه التقييم جاري حسب الأحداث وحسب الأوضاع الأمنية
*نعم إذا سعادة الوالي ماذا عن التدابير الأمنية المتخذة لضمان عودة الحياة الي طبيعتها كما كانت في السابق ؟*
طبعاً احنا وضعنا خطة جديدة أول امس من جهة فنية في فريق عنان جا ومعاهو الفريق منور وضعو خطة بالنسبة لينا خطة تأمينية جيدة جداً ااا بموجب الخطة دي الليلة انشاء الله حنطبق الخطة دي انا ما داير اوري التفاصيل والناس حيشوفوا الواقع إنشاء الله
*نعم.. أيضاً الملاحظ أنه دائماً سعادة الوالي ما تتكرر مثل هذه الأحداث بمدينة الجنينة ما حقيقة يجري بالضبط ؟*
الحقيقة طبعاً بسيطة جداً في احتقان شديد بين المساليت والعرب نتيجة لأشياء الظاهر قديمة فقتل شخص واحد ادي إلى ما أدى إليه الآن يعني … لكن انا ما بقدر بقول دي مشكلة قبلية لانو الحصل انو كتير من المجرمين انتهزوا الفرصة بتاعة قتل شخص وجو طبعاً سرقوا ونهبوا وقتلوا وعملوا الحاجات دي كلها لكن ما نقدر ننسب لقبيلة معينة لانو هؤلاء الناس أصلوا منتظرين تحصل حاجة ويجوا كلهم يجتمعوا من كل جهة عشان ينهبوا. ده الحصل.
*أيضاً هنالك من يقول إن هذه الأحداث ربما يكون فيها أيادي خارجية ما تعليقكم علي ذلك ؟*
ما خارجية بالمعني ده لكن في أيادي من المؤتمر الوطني شغالة. المؤتمر الوطني فقد كل اراضية وفقد الوظائف وفقد اي شيء عشان كده هو شغال علي أساس انو يولع النار والمشاكل انا متأكد انو المؤتمر الوطني وراء القصة دي لكن طبعاً انتهز الفرصة بتاعة مقتل شخص وبعد داك ولع الشغلانه هو عندو قدرات. عندو قدرات. قدرات مالية وناس بخططوا والي آخره لكن علي اي حال حنتخذ إجراءات إنشاء الله المسألة دي ما تتكرر تاني
*هل لديكم معلومات دقيقة هو حصيلة القتلى والجرحى الحقيقيين من جراء هذه الأحداث؟*
والله لغاية هسي انا ما عندي نهائياً لانو المفترض المدير العام للصحة هو اللي يحدد لكن في ارقام ماشة انا ما بعتمد علي ده لغاية هسي انا ما عندي رقم نهائي . لكن الموتي فوق المية
*سعادة الوالي هناك المئات ممن نزحوا وما زالو جراء هذه الأحداث إلى داخل مدينة الجنينة إذا كيف تتعاملون مع هذا الوضع ؟*
طبعاً الوضع الإنساني صعب جداً وداير معالجة سريعة واااا انحنا هسي بدينا نوزع الغذاءات بالنسبة للنازحين الهسي الموجودين في المؤسسات الحكومية والتوزيع ماشي لكن طبعاً العندنا ده ما بكفي لانو عندنا عدد حوالي 60 ألف نازح وهؤلاء كلهم يحتاجون إلى الغذاء والمأوي وااا أشياء اخري برضوا والصحة فااا إنشاء الله في الأيام الجاية طلبنا من المركز انو يدعمنا والدعم ماشي صدقوا لينا بعض المال عشان نشتري بعض الحاجات العينية هنا في المدينة ما وصلنا المال لسه لكن العندنا ده ممكن نوزعوا لغاية بعد بكرة كدا وخلاص إنشاء الله الأشياء تجي نوزعا للآخرين للنازحين إنشاء الله
*هل قمتم بحصر المراكز التي يتواجد فيها هؤلاء النازحين الآن ؟*
حوالي 42 مركز تقريباً حتي الآن لكن ده ما كفاية هسي في حتات تانية مؤسسات بتاعة مؤتمر وطني نديها ليهم يسكنوا فيها لكن العدد حيبقي أكتر من ستين بعد شوية
*اذا كيف ترون تأثير هذا علي سير دولاب العمل بالولاية خلال الأيام المقبلة ؟*
طبعاً انحنا اخرجنا النازحين برضاهم في الأيام الفاتت من مؤسسات الدولة حسب أعمال العنف الحصلت في كيريندنق 1 الآن كل ما بنيناهوا انهار معناها نبدأ من جديد ما نقدر نقنع الناس انهم يرجعوا هسي لكن علي اي حال دايرين لينا وقت ودولاب العمل حيقيف لانو كل المؤسسات الآن تم السكن فيها محتاجين الناس سكن فلذلك الوزارات المدارس الداخليات حتبقي في مشكلة و انشاء الله في الأيام الجاية نسعي نتفاهم معاهم انشاء الله
*اذا ماذا عن الجهود المبذولة لإيواء النازحين بالتعاون مع المنظمات الاممية المتواجدة بالولاية ؟*
هسي بعد شوية حيوزعوا ليهم خيم انا أمرت انو في خيم كده حيودوا لجهة معينة والخيم هي 400 خيمة فقط واا في اشياء تانية مشمعات برضوا حيوزعوها ليهم لكن ننتظر من WFP حيجيبو مواد كبيرة جداً حسب ما كلمونا أمس لكن الشي العرفتو انو مافي وقود في الخرطوم ده اشكال.
*مع وصول التعزيزات العسكرية المتوقعة خلال ساعات ماذا عن الارتكازات حتي تعود الحياة الي طبيعتها خاصة ان بعض الأماكن لا يوجد بها ارتكاز؟*
الارتكازات دي طبعاً جزء من خطة و حنفذة إنشاء الله ارتكازات في السوق والحتات اللي فيها بؤر بتاعة مشاكل وفي خطة عامة إنشاء الله في كل الولاية في المحليات الأخرى القوات حتمشي عشان الناس كلهم يشعروا بالاطمئنان معسكر كيريندنق حنضع فيهو ارتكازات كتيرة جدا علي أساس انو كتير من النازحين لو شاءو يرجعوا باطمئنان تام.. نعم ..
*إذا هل نستطيع القول إن هناك خطة محكمة في هذا الجانب ؟*
نعم خطة أمنية محكمة جدا تشمل كل الولاية. ايوه التفاصيل اعفيني منها
*
*ونحن نسير نحو خواتيم هذا اللقاء سعادة الوالي الي اي مدي هنالك تنسيق ما بين القوات النظامية الموجودة بالولاية ؟*
الخطة دي ما هي خطة تنسيقية عندنا واحد من ضباط الجيش الكبار اللهو العميد حيدر شرة حيترأس الغرفة كلها الغرفة دي فيها الشرطة والجيش والدعم سريع والامن وكل الاتجاهات دي كل القوات دي الغرفة دي فيها ضباط كبار برضوا حيخططوا وتجي بلاغات وهما اللي بيتحركوا علي أساس البلاغات وعلي اية حال الخطة هي محكمة كويسة جداً إنشاء الله الناس حيشوفوا الأثر في الأيام الجاية
*اذا ما هي رسالتك الأخيرة لكل مواطني غرب دارفور وعموم السودان؟*
انا آسف جداً لما حدث وده مسؤولية كبيرة ملقاه علي عاتقنا قد نكون قصرنا او ما اتصرفنا في الوقت المناسب لكن علي اية حال الأيام الجاية إنشاء الله حتشهد إستقرار تام والتعامل بحزم شديد وانحنا زي ما أنا قلت ادينا تفويض للقوات انو يستعملوا النار في اي تفلت وده انحنا طبعاً خلينا للقوات وللغرفة زاته تضع قواعد الاشتباك علي أساس انو ما يبقي قتل من طرف ساكت قتل قانوني انحنا قلناه انو مفوضين هما حسب تفسيرهم وحسب قواعد الاشتباك عندهم يتصرفوا وده انا افتكر حيجعل الأمور تستقر انشاء الله
*نأمل ذلك.. سعادة والي ولاية غرب دارفور الأستاذ محمد عبدالله الدومة و نشكر لك سعة الصدر في الإجابة علي كل اسئلتنا ونتمنى ان نلتقي والولاية أكثر امنا واستقرارا وسلاماً* .
شكراً لك
شكراً.. شكراً.
