عادت الخرطوم وبحري وامدرمان بهية
ساحة الحب والأماني وزينة البلدان نقية
بي تراتيلا وبهاها وشمسها الضواية طيبة
فيك خلاوي الدين ترتل في كلام الله ورسوله
المدائح السمحه تشدو
وتكاوي الدين تهلل
بي الأماني السندسية
وفي مولد المعشوق سارية الأعلام ترفرف
ونوبة الولهان تدفدف
في رسول الله وحبيبو
بي نفوس سمحه ونقيه
وريحة المستك مبعثر
في النفوس العاشقه سايحه
في سموات الله البهية
عادت الخرطوم وبحري وأمدرمان بهية
ساحة الحب والأماني وزينة البلدان نقية
هنا أمدرمان
وساريتنا ديك تهدي الرايح الضهبان
أهلك حنان
وجلسة الحيشان
واحة الحبان
أهل العلم والبيان
ورمز الطيبة والقوة والعنوان
عادت الخرطوم وبحري وأمدرمان بهية
ساحة الحب والأماني وزينة البلدان نقية
نيلك الخالد يزغرد
في ضفاف ابي روف عليلك
ومقرن النيلين دليلك
وتوتي يا رمز الصمود
وانتي يا وطن الجدود
صمودك المحزون وحضنك الحنون
وشفنا غدرك يا ام قرون
لي مالنا وحبايبنا وديارنا
وارضنا المزروعه طيبة ..
عادت الخرطوم وبحري وأمدرمان حبيبة
ساحة الحب والأماني و زينة البلدان نقية
شكينا فيك يا ام قرون وما خاب ظنونك
في حقدك وخيانتك
ما تشبهينا في أخلاقك وفي البدون
والنفاثات في العقد
وسحرك المسكون جنون
كلك ضغائن ومليانة ريبة
منشور سمومك في العيون
عادت الخرطوم وبحري وأمدرمان حبيبة
لي قلوب حنينة ومليانة طيبة
أنا الخرطوم انا العنوان
وبحري يا ست الحسان
أنا أمدرمان أنا السودان
شعبك حنون
تنوع فريد
وقبائل سمر
شنقيط وهلباوي
جعلي ودنقلاوي
فور وزغاوي
وشايقي وبجاوي
فلاته وبني هلبة ومحشي ومسيري
ورزيقي وتعايشي و نوباوي
تزاوجنا وتصاهرنا
وبي جوامعنا وكنائسنا انصهرنا
بي أمننا وأماننا
وبي حبنا وإيمانا
تصافينا وتسامحنا
تواددنا وتراحمنا
وعشنا عيشتنا الهنية
عدتي يا أمدرمان بهية
رجالهم كتر
نساهم سمر
وشبابهم نضر
و عيونهم حمر
جباهم عاليه والمشية فوق
فوق الجمر
ساحة الحب والمعاني والعيشة الهنية
عادت الخرطوم وبحري وأمدرمان بهية
عدنا ..
بي قوة الشبان جسارة
ورجالنا ما برضو الحقارة
رجعو الخرطوم قنقر رجالة
وبحري
والصالحة أمدرمان
ودي كانت نهاية الجرذان
ودي يا ام قرون نهايتك
من كدايس تعشعش في العمائر
لي معرد او جيفة في الخيران
هنا أمدرمان والصالحة كانت
كانت نهاية الجرذان
بي حمرة عين
وبي جيش قنقر
مستنفرين جوك
ومشتركة فوق
بكاتلو في جنود الشر
وأعراب التتار
والأصمعي عند سواله ، بم عرفت ربك ؟
فهل يا تري عرفو الخبير ؟
فالبعرة تدل علي البعير
والمسار يدل علي المسير
فسماء ذات أبراج وأرض ذات فجاج
الا تدل علي اللطيف الخبير ؟
والناصر الله والحافظ الله
حفظ الدين .. ونصر الحق وزهق الباطل
وعادت الخرطوم وبحري وأمدرمان بهية
ساحة الحب والأماني زينة البلدان نقية
وانتي يا الفاشر
فاشر السلطان عصية
وستعودي يا دارفور أبية
وعادت الخرطوم وبحري وأمدرمان بهية
ومقرن النيلين حزنان يعاين من بعيد
لي مليشيا شتات
الغدر شيمتك والنهب طبعك
وفي بيوتنا بيات
وبي هوية سالف
جاتنا ام كعوك بي تفكير مخالف
واخلاقا تخالف
لي كلام الله وكتابو
النيل هداااك
والقصر داااك
وعلمو الخفاق يرفرف
فوق قصرك المسكون يكفكف
لي دمعة المظلوم تجفف
ولي لوعة المحروم تخفف
ولي شبابنا ولي شعوبنا ولي كتائبنا وجنودنا
ظلوا متحدين
ونهتف
جيش واحد شعب واحد
جيش واحد شعب واحد
وعدتي يا الخرطوم وبحري وأمدرمان نقية
وانتي يا الخرطوم بهية
فيك الغناء
وانتي المني
فيك القيادة وفيك الريادة
النقارة والطنبور يغرد
ورقصة العاشق الولهان
ودموع الحب ولهفة الوجدان
ونهرك الخالد
الازرق المليان عذوبة
والأبيض الدفاق خصوبة
شفشفونا
ودمرو التاريخ
ومحو الثقافة
حتي المتاحف لم تسلم من العربان
ساحة العلم
والمروءة والإيمان
ساحة الحب والود والحنان
حسدونا …
في زرعنا وفي ارضنا
وفي رجالنا وفي دهبنا وفي سمحنا
وحقدوا علينا وبشتنونا ؟
في تراثنا
في مرؤتنا وعلمنا
وفي سماحتنا وطيبتنا وكرمنا
بهدلونا وعذبونا …
والله في
ويعود شبابنا وتعود جيوشنا
منصورة فوق
ولي سلاحهم بدت تجرد
خلت الغادر يعرد
وعدتي يا الخرطوم بهية
ورقصة الفرسان ندية
ونظرة الحبان خفية
وعدتي يا الخرطوم بهية
بي رجالك وبي شبابك وبي نسائك
وبي عيون مليانة طيبة
وبي قلوب خضراء ونقية
عدتي يا امدر امان وانتي يا الخرطوم أبية
ساحة الحب والأماني وزينة البلدان نقية
نحن جند الله جند الوطن
ان دعا داعى الفداء لم نخن
نتحدى الموت عند المحن
نشترى المجد بأغلى ثمن
هذه الأرض لنا
فليعش سوداننا علمآ بين الأمم
يابنى السودان هذا جيشكم
يا بني السودان هذا شعبكم
يحمل العبء ويحمى ارضكم
عادت الخرطوم وبحري وأمدرمان بهية
ساحة الحب والأماني وزينة البلدان نقية
عادل المفتي
٢٧ مايو ٢٠٢٥م
-
-
-
-
-
-
