هشام الكندي يكتب : جرد حساب .. دكان حمدوك الجرورة والخسارة

بعد ثلاثون عاما بقبضة الحديد سقطت حكومة ثورة الإنقاذ الوطني وودع أهل السودان عهدا اتسم بالبطش والقهر والاستبداد لتصحو الخرطوم على فجر ثورة ديسمبر المجيدة وتتصدر هتافات الشارع الحرية والسلام والعداله المشهد ، ارتال من الشهداء الشباب سقطوا واجهوا ضراوة الرصاص بصدور مكشوفة وبسالة عالية أعالي الترس وبوابة القيادة العامة من اجل الحياة القادمة شبابا في اعمار الزهور (حرقوا حشا) الأمهات والخالات يحملون امالا واحلاما بأن غدا يكون مشرقا وتتفتح الازهار في أرجائه وأن ينهض رجل أفريقيا الكسيح المريض من سباته الذي طال ونصل به مرافئ الدول المتقدمة كمحور دول الجوار على أقل تقدير ، عطفا على إنشاء حكومة مؤسسات مدنية راسخة بعيدا عن حكم العسكر وقبضة الأمن . وبعد طول تداول أتى الدكتور عبدالله حمدوك مترجلا على صهوة جواده وزيرا لمجلس الوزراء وكان حمدوك قد ظهر أسمه للشعب في اخر تكوين لحكومة العهد البائد ليكون وزيرا للمالية لكنة (زاغ ) في آخر دقيقة ولا نعلم السبب ، توسم الشباب الثوار بأن يكون حمدوك الأيقونة والمهدي المنتظر يحمل أشواق أمه وشعب متعطش للحرية والتقدم والسلام لوطن تتجاذبه سوسة التقسيم ويتهاوى من ويلات الحرب الأهلية البغيضة ويترنح من أمراض الطفولة الإقتصادية والسياسية والاجتماعية الموروثة ويعجز مفكروه لبناء نمط الشخصية السودانية لتواصل الأجيال في تسونامي الاستلاب الحضاري والفكري (كيف يكون الحال إن ماكنت سوداني وقت الحاره ديل أهلي) شعبا كريما شفافا أصيب بالصدمة والتغزز من ممارسات الساسة عبر كل حكوماته منذ نيل الإستقلال المجيد حتى صار مرضيا لا يقوى على الحراك . لذا كانت آفاق وتطلعات الشباب قوية وعالية حتى يحققوا آمالهم وطموحاتهم ، فارادو أن يكون التغيير سريعا وكبيرا أملا في تعويض ماضي السنوات ، فكان من حق الشباب أن يثوروا ضد حكومة الإنقاذ (دكان ودالبصير) على الأقل ود البصير تقلد لجنة الدكان ثلاثون عاما رافضا التنازل والتنحي ولم يستمع لمشورة احد وعند كل انتخاب للدكان ياتوا بالمواطنيين على ظهر البكاسي واللواري وبعد اعلان النتائج بفوز الشجرة تكون العرضة (أسد الكداد الزام) ، السيد اللمبي الصديق العزيز لود البصير كان مشرفا على الدكان لفترة طويلة لم يستطيع الأعضاء تغييره باعتبار الصداقة الشديدة بود البصير عدد من المرات كان يشتكي لحاحه (هداية الله) أم ودالبصير حال وجود مضايقة من اعضاء الدكان بس الناس كانوا زعلانيين منو شديد في كل مرة يتم سرقة الدكان يقول ليهم (الناس تتوزغ على الاركان ويكون الدفاع بالنظر أي زول يشوف الحرامي يكلمنا) وكذلك الناس زعلانة من أعضاء الدكان لأنهم باعوا الضفادع والجراد للناس باعتبار انو فيها فيتامينات لكن الناس كانت زعلانة اكثر من ود البصير نفسه لانو سمح لناس فلان يشيلوا السكر والزيت وحجار البطارية يبيعوهم في السوق الأسود حتى عملوا العمارات في كافوري وركبوا الكروزر و البكوس دبل كاب ، وكلو مرة يتم سرقة المخزن من عصابة أولاد الفكي ولا يقدموا للمحاكمة (كان بتعرفوا زول سرق وروني ليهو) طيب إنت ماعارفو هو اصلا مفتاح المخزن عند اللمبي والركابي يعني ما في طبله اتكسرت) والناس برضو زعلانة من ودالبصير شديد قال في خطاب الجمعية العمومية (حصل أنا كضبت عليكم) وكان آخر خطاب في منصة الساحة الخضراء حينما قال ودسرالختم (تاني مافي صفوف إلا صفوف الصلاة) حينها الناس كانت واقفا في عز الهجير صفوف البنزين العيش الغازالبنوك (الأعمى شايل المكسر) الدكان في الفترة الأخيرة تأثرت حجم المبيوعات خاصة بعد زيادة أمين المال الركابي لسعر دولار (الجراميك) بعدها كل الأشياء (طارت السماء) واي زول يزيد ويقول الدولار زاد ، على الرغم من سوء إدارة مجلس ودالبصير للدكان الناس كانت تمام التمام والأمور ماشا (وما في زول أبا عشا) الحركات المسحلة الأحزاب التقليدية حاولوا إسقاط الدكان لم يستطيعوا .. ثار الشباب ثورتهم القوية واعتصموا أمام مبنى الدكان لأيام وايام حتى استطاعوا ازاحة حكم عسكر دكان ودالبصير ببيان (ود ابنعوف) وقدموا ارتالا من الشهداء في سبيل ذلك ، تنفس الشباب الصعداء حتى تم اختيار الدكتور حمدوك لتولي رئاسة الدكان الجديد والعمل على إزالة كل اشكال التمكين لدكان ودالبصير (صامولة صامولة) فتم ايداعهم السجن ، ودالبصير واللمبي ودالبكري حتى زوجة ودالبصير أيضا وخفير الدكان والناس الفارشين البرش بصلوا المغرب جنب الدكان كلهم جوه ( اللومان) بعد كواركيك وجوطة تم تعيين مكتب الدكان الجديد معظمهم مغتربيين من خارج البلد ناس مروقين الناس ليس لديها معرفة بهم عدى واحد منهم اسمو (ودالمدني) تقلد مكتب التموين الناس عرفتو عشان كان واقف مع الثوار حتى انقطعت (تكة) السروال من شدة الجري فتم مكافأته بالمكتب المهم الفيهو معاش الناس ، التشكيل الوزاري الجديد للدكان فيهو ثلاثة من النساء ماشاء الله مسؤلة الرياضة ( لافه) ليلا عملت مشكلة مع الولد العسكري فى الكبرى يمكن يكون تم رفدة ومسؤلة علاقات الخارج سلحفائية الايقاع ، الأمور ابت تمشي في الدكان (الحاجات ) كلو يوم ماشا في زيادة وناس اللجان ما عاجبن الحال كلو يوم مظاهرة كلو يوم مذكرة المواد الغذائية والبترولية في ندره الأسعار طارت فوق السماء تم رفع الدعم من الخبز العيشة بقت جنيهين وتزاحم الناس زايد ، كذلك الوقود رفعوا الدعم عنه ولم تختفي الصفوف ، ودالمدني يصرح بأن أزمة الخبز تحل خلال ثلاثة أسابيع لكنه (بالغ بوليغ) المواطن أصبح غير قادر على الشراء السحب بقى على الجروره و عمك البدوى يسجل على الدفتر الناس الكانوا بشتروا ضان اصبحوا يشتروا عجالي والعجالي بقري والبقري (عكو وكوارع) زيت الفهد بالرطل بدل الباقة وصابون الضرب بالقطعة بدل الكرتونة وجنا الجداد بالحبة بدل الطبق مشوار الركشه بقى بسعر الركشة قبل عشرة سنوات طلب الفول من غير الجبنة فات المية جنيه رطل اللبن المقنن فات الخمسين جنيه الناس ضاق بيها الحال . ودحمدوك ماجايب خبر الناس مشوا ليهو في المجلس أعطاهم حديث الشعر بوجه باسم
سنصمد سنعبر سننتصر .. الشباب الذين اتوا بقادة الدكان لم يبرحوا مكانهم من مسطبة لمسطبة لا شغل لا مشغلة حتى أصبحت آمالهم وطموحاتهم تتبخر حتى مطالب الثورة بتحقيق عدالة فض الاعتصام من لجنة أديب مكانك سر وحتى رموز دكان ود البصير لم يحاكموا وسقطت هيبة الدكان حتى أصبح الدكان ملاذا لطق الحنك ، شركة الفاخر أعطيت حق صادر الذهب من غيرحصائل الصادر الدكان يجيز فاتورة شراء العربات دون النظم المعمول بها ودالشيخ يبيع تنكر الوقود في السوق السوداء ، لم يتم تشكيل وزراء ولاية ولا مجلس تشريعي ، لجان المقاومة مكتوفة الأيدي لما يجري لحال المواطن ادوها (حبال من غير بقر) الناس كلها تئن وتشكي حتى قرارات الدكان بشأن (الرده والخمر) لم تثمن من جوع و مالله لله ، المواطن يحتاج قرارات توقف تهريب الوقود والدقيق والذهب والدواء والدولار تخدم قفة الملاح .. دكان حمدوك بعد جرد الحساب فشل كبير حتى نادى البعض بعودة ود البصير الذي كانت في عهده الحياة ماشة باسطة وسعر البسبوسة اليوم يصل ثلاثمائة جنيه والدولار تخطى شارع المئة وستون (ومفحط) ، ارتال القمامة والصرف الصحي تزكم الأنوف وحديث الشعر بالعبور والانتصار لايجدي لأن الثورة أتت بالدماء من أرواح أبنائنا الشباب وكم هي غالية لدينا الشعب يريد قرارات قوية مدروسة ورؤية حكيمة لإدارة شكل الدولة الجديد والخروج من معلقة سنصمد سنعبر سننتصر لأن الشعب أوشك أن يتم بيت المعلقة ويقول (سنموت) .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى